Tatarstan Rossiyaneñ iktisadıy yaktan alga kitkän regionnarınıñ berse. Respublika vakıtlı matbugat basmalarınıñ küplege buença da, Rossiyadä äydäp baruçılardan sanala.
här meñ keşegä 515 danä vakıtlı matbugat basması turı kilä (Rossiyadä urtaça kürsätkeç 219 danä täşkil itä).
2007 elnıñ 1 gıynvarı kürsätkeçläre buença Tatarstanda 1113 massaküläm mäglümat çarası terkälgän. Şularnıñ 22e ‑ däülätneke.
Basma matbugat:
Tatarstanda barlıgı 825 gazeta‑jurnal terkälgän. Şularnıñ 106sı ‑ däülätneke.
Tatar telendä 110 gazet, 28 jurnal çıga. Däülät karamagında isä 46 gazet häm 9 jurnal isäplänä. Massaküläm mäglümat çaraları arasında: xatın‑kızlar, balalar häm yaşüsmerlär, ädäbi, milli, maxsuslaşkan häm başka sotsial temalarga kagılgan basmalar çıgarıla.
Däülät yardäme belän çuvaş telendä: Aksubay, Çüpräle, Norlat, Bua rayonnarında häm respublikada “Suvar” gazetası çıksa, udmurt telendä Baltaç rayonında gazeta näşer itelä.
Televidenie häm radio
Respublika territoriyasendä 50 televizion kompaniya bar. Alarnıñ 30 tatar häm rus tellärendä eşli. 25 däülät telekanalı isäplänä.
Töp yunäleşe milli tematikada bulgan “Tatarstan–Yaña gasır” teleradiokompaniyase eşli. Telekanal tamaşaçılarına törle yaktan bay bulgan programmalar tägdim itä: 1) xäbärlär, 2) ictimagıy‑säyasi programmalar, 3) teleseriallar, 4) tok‑şou, 5) sport yarışları, bäyräm çaralarınnan turıdan‑turı translyatsiya.
“Eutelsat W 4 (36 gr. v.d.) sputnigı yardämendä “Tatarstan‑Yaña gasır” kanalın Rossiyaneñ Evropa, Seberneñ könbatış öleşe, Ural, barlık SNG illäre häm yakın çit illärdä dä karau mömkinlege bar. Tulırak mäglümatnı telekanal saytınnan tabarga bula. Vakıygalar belän tulırak tanıştıru öçen korrespondent punktları açu eşe alıp barıla. Korrespondent punktların respublikanıñ Mäskäü, Sankt-Peterburg, Orenburg, Ekaterinburg, Çiläbe, Astana şähärlärendäge tulı väkalätle väkilleklärendä açu küzdä totıla.
Respublikanıñ 24 rayon häm şähärendä däülät telestantsiyaläre eşli. Alar barısı da ike däülät telendä söyli.
Tatarstanda 86 radiostantsiya bar, alarnıñ 14e ‑ däülätneke. 58e – rus, 6sı – tatar, 22se ‑ rus häm tatar tellärendä eşli. Leninogorskiy radiosı rus, tatar, çuvaş häm mordva tellärendä söyli.
MÄGLÜMAT AGENTLIKLARI
Respublikada 10 mäglümat agentlıgı bar. Respublikada “Tatar‑inform” ( www.tatar-inform.ru) däülät agentlıgı eşli. “Tatar–inform” sıman, “İntertat” elektron gazetası tatar häm rus tellärendä çıga. “İnterfaks”, “Ria‑novosti”, “İTAR‑TASS” kebek gomümmilli mäglümat agentlıklarınıñ regional bülekçäläre eşli.
Tatarstan Respublikası “Tatmedia” Massaküläm mäglümat agentlıgı, barlık respublika massaküläm mäglümat çaraların üz eçenä algan www.tatmedia.com portalın buldırdı. 2005 elda portal Rossiyadä “dürtençe vlast” digän nominatsiya buença berençe urınga laek buldı.
NÄŞRİYaT hÄM POLİGRAFİYa
Respublikada 230 poligrafiya predpriyatiyase, 40tan artık kitap näşriyatı bar. El saen alar 3‑3,5 mln. tiraj belän 1000 törle kitap çıgara. Däülät karamagında 7 poligrafiya kompleksı häm 2 kitap näşriyatı eşli. Respublikada milli häm maxsuslaşkan basmalarnı, sotsial ähämiyatkä iya kitaplarnı çıgaruda näşriyatlar öçen däülät yardäme programması eşli.
|
