| «Yañarış»nıñ 28nçe iyun sanında dönya kürgän «Şähre Bolgar
xalık küñelendä» digän yazmanı min kat-kat ukıp çıktım. Erak babalarıbıznıñ eze
kalgan, dinebezne kabul itkän şul cirlärdä balaçagım ütkängäme, miña ul cirlär
bik kaderle. Tugız el ayaksız xasta bulıp yatkan äbiemne, sıer cigep, şuşı izge
cirgä alıp baruımnı bügengedäy xäterlim. Ul ukıgan räxmätlär äle dä kolagımda
yañgırap tora. El saen avıru änkäm dä, atam da - barıbız da şul cirlärgä ber
barıp kaytmıy kalmıy idek. (Täteştän erak tügel üstem min). Rabiga küle, Gabdraxman
koesı, Cämig mäçete, Olı manara, Akpulat, Karapulat nigezlären kürergä, şul
cirlärdä yörergä nasıyp itkäne öçen Allahı Tägalägä meñ-meñ räxmätlemen.
Uzgan gomer yulımnı küz aldımnan uzdıram da, 7-8 täülek aç
kileş traktorda eşlägän çaklarda da, karañgı ber töndä olı çokırga traktorım
belän töşkändä dä, Kirovta eşlägändä olı facigagä yulıkkaç ta, 14-15 yaştä okop
kazıganda da, kul-ayaklar öşep ozak avırıp yatkanda da, (tänemneñ ber kiselmägän
cire dä yuk, altı operatsiya ütkärgän keşe min) sugıştan küp cäräxätlär belän
kaytkan, invalid iremne tärbiya kılganda da izge cirne olılavım öçen Allahı
Tägalä miña şulkadär sabırlık, köç, yardäm birgänder. Bügenge köndä İzge Bolgar
cirenä säyaxät kılu öçen mömkinleklär bar. Mäçetlärebez dä el saen säyaxätlär
oeştıralar. Mäkkägä Xac kılırga barıbız da bara almıybız bit, ä İzge
Bolgarıbız kul suzımı cirdä genä. Barıbızga da anda barırga Xoday Tägalä nasıyp
itsen ide.
Käüsäriya
Nurulla kızı,
İjau şähäre.
Kire kayt
|
