2010 – Ukıtuçı elı

Rossiya külämendä dä, Tatarstanıbızda da 2010 elnıñ Ukıtuçılar elı dip iglan itelüe oçraklılık tügel. İldä mägarif sistemasınıñ cämgıyattäge üseş-üzgäreşkä cavap birerlek bulmavı üzen torgan saen nıgrak sizdergän şartlarda mägarif ölkäsenä igtibar kiräklege – zamana taläbe ul.

Optimistik ruxta başlanıp kitkän Ukıtuçı, mägarif, belem elında Tatarstan Respublikasınıñ üseş programması mega-proektı tormışka aşırılaçak. TR mägarif häm fän ministrı Albert Gıylmetdinov jurnalistlar öçen ütkärelgän videobrifingta anıñ töp yunäleşlärenä tuktaldı. Älege programmanıñ ber öleşe – mäktäptä belem birüneñ yaña standartların kertü. Bu eş başlangıç klasslarda inde eksperiment tärtibendä başlanıp kitkän. Yaña uku elınnan respublikanıñ barlık mäktäplärendä dä ukıtu yaña standartlarga nigezlänäçäk. Ministr yaña standartlar Tatarstannı tulısınça kanägatländerüen, milli mägarif öçen moñarçı kürelmägän uñay şartlar tudıruın assızıkladı.

BDİ da kiläçäktä ukuçını bäyaläüneñ berdänber ısulı bulmayaçak. Balanıñ cämägat eşlärendäge aktivlıgı, talantı, bäyge-konkurslarda katnaşuı – härkaysı bizmängä salınaçak. Bıel BDİ tapşıruda ällä ni üzgäreşlär kötelmi. Ä menä 2011 el çıgarılış klass ukuçıları BDİ şartları turında yaña uku elı başında uk tulı mäglümatlı bulaçak. Ministr ukuçılarnı da, ata-analarnı da ömetländererlek ber fiker äytte: matematikadan BDİ biremnären ukuçınıñ nindi vuz saylavına karap, törle avırlıkta itüläre, yagni gumanitar vuzga kerüçelär öçen biremnärne gadiläşterüläre ixtimal (bilgele, bıel tügel).

Talantlı ukuçılarga, avır xäldä kalgan balalarga bulışu, balalarnıñ fizik sälamätlegen kaygırtu, mäktäplärneñ material bazaların yaxşırtu programmanıñ aerım yunäleşläre.

Älege programmada ukıtuçı şäxesen formalaştıruga, anı üsterügä, abruen kütärügä yunälderelgän çaralar da bixisap küp. Şunısın da äytergä kiräk, mögallimnärgä taläplär dä şaktıy katgıy bulaçak.

Respublika mägarife üseşendä Çallı yul yarıp bara disäk tä yalgış bulmas. Ukıtuçı elın da şähärebez mägarif idaräse berençe bulıp açıp cibärep, maksat-plannarın, eş yunäleşlären iñ aldan bilgeläde. Şähärdä mägarif ölkäsendä moña kadär tormışka aşırılıp kilgän proektlar, yunäleşlär, kürkäm traditsiyalär dävam itäçäk. Aldıngı ukıtuçılar üzläreneñ eş täcribäläre belän urtaklaşıp, master-klasslar kürsätäçäklär. Mäglümat çaraları aşa alarnı gadättägeçä el dävamında yaktırtıp, kiñ cämägatçelekkä citkerep toru küzdä totıla. Bolardan tış, mägarif idaräse başlıgınıñ berençe urınbasarı İldar Yarullin äytüençä, bıel eşmäkärlär, predpriyatie citäkçeläre, şeflar belän berlektä, sotsial proektlar oeştıru küzdä totıla.

Ukıtuçı elı kısalarında pedagoglarnıñ xezmät xakların arttıruga, aldıngılarnı, yaxşı näticälärgä ireşkän pedagoglarnı büläkläügä yunälderelgän çaralar da baytak. Şularnıñ berse – “El ukıtuçısı-2010” şähärebezdä start aldı inde. Bäygeneñ şähär turı ber aydan – fevral axırında ütkäreläçäk.