Uzgan sannarnıñ bersendä “Küşär”dä bozaularnı yañaça tärbiyaläü bäyan itelde. Älege bozaular toragınnan 2,2 tsent­ner avırlıkka citkän ügez bozaularnı – simertü gruppasına, ä tanalarnı aerım törkemdä tuplıylar. “Bügenge köndä Möndeş fermasına 6 aydan yugarı yaştäge 180 tana tupladık”, – di baş zootexnik Firdinat Sämigullin.

Möndeştä aerım brigada bularak eşlilär, ä xezmät xakı üseş aluga bäyle. İñ möhime – avıl xalkı eşsez tügel. Brigadanı Fail Möxämmätov citäkli. Tanalarnı terlekçelär Dilä häm Marat Äminovlar tärbiyali, gıynvarda ber baş terlektän täüleklek urtaça 880 g üseş algannar.

Möndeş fermasında berniçä ay tärbiyalängäç tanalar 3,60-3,70 tsentner avırlıkka citälär. Şunnan Küşär fermasına kiterälär, tanalar Danil Gabdraxmanov häm Azat Galimcanov tärbiyasenä küçä. Mondagı torak ta zamança tärbiyagä korılgan. Älegä terlekçe egetlär karamagında 210 baş tana bar, aldagı aynı ber baştan täüleklek urtaça 841 g üseş algannar.

Toraknıñ eçen şärexläp ütik. Tanalarnı yaş häm fiziologik üzençäleklärenä karap, törle yakka häm kirägençä açıla-yabıla torgan timer aratalar belän bülengän dürt bülmädä tärbiyalilär. Tanalarnıñ astı – kalın salam tüşäk, bäylämiçä tärbiyalänälär.  Allarında tagarak tulı furajlı senaj, su – kardada, TEN belän cılıtıla. Kön niçek kenä suık bulmasın, su gel ber törle cılılıkta tora. Bez kilgän könne dä salkınça ide, ämma tanalar kardadan kermilär diyarlek. Kardada salam eskert­läre urnaştırılgan, terleklär çemçenälär, salkın cildän dä salam eskertenä ışıklanalar. Kıskası, saf havada räxätlänep yörilär. Toraktan kar­daga çıgu yulında yasal­ma orlık­landıru bül­mäse bar. “Probnik” ügez yar­dämendä teläkkä kil­gän tananı açıklap, şu­şı bülmägä urnaştıra­lar, yasal­ma orlıklandıralar.