Mäktäpneñ tärbiya eşläre buença direktor urınbasarı Zoya Çubaraeva:

– Volodya – mäktäbebez gorurlıgı. Ul 7 nçe klassta gel 5 le bilgelärenä ukıy, yaxşı sportsmen. Klasstan tış çaralarda aktiv katnaşa. Uzgan el Ufa şähärendä ütkän “Yaş talantlarnıñ bötenrossiya konkursı”nda gitarada uynau buença keçe törkemdä ciñüçe buldı. Añarçı Bakalıda ütä torgan “Poy gitarnaya struna” konkursında berniçä el rättän I urın algan ide. Bıltır Oktyabrsk şähärendä uzgan yaş gitaraçılarnıñ zona bäygesennän II däräcä diplom belän kayttı, – dip, yaş muzıkantnıñ uñışları turında söyläp kitte.

Volodya gailädä ber genä bala ikän. Änise – Roza Vladimirovna başlangıç klass ukıtuçısı, ätiläre neft eşendä. Öçese dä gitarada uynıylar. Bergäläp kontsert ta kuyalar, çañgıda da yörilär, şaxmat ta uynıylar. Cırga mäxäbbät näsellärennän kilä. Äbiläre – Lyudmila Pavlovna Zolotova gomer bue “Sönäkäy” keräşen xalık ansamblendä cırlagan. Bakalıda ütä torgan “Semeynaya mozaika” konkursında gailäläre belän keräşen cıruları, takmakları başkarıp, berniçä tapkır ciñüçe bulgannar. Onıgınıñ muzıka buença kitep, zur uñışlarga ireşäçägenä şiklänmi Lyudmila Pavlovna.