16 mart könne Rus Şugan urta mäktäbendä tantanalı çara ütte – munitsipal rayon başlıgı, rayon Sovetı räise Rişat Xäbipov cirlekkä kergän avıllarda yaşäüçe 32 tıl häm ike Böek Vatan sugışı veteranına Böek Ciñüneñ 65 ellıgı uñaennan yubiley medalläre tapşırdı. Danlı tormış yulı ütkän veterannar xörmätenä ukıtuçılar häm ukuçılar köçe belän bäyräm kontsertı häm çäy tabını äzerlängän ide. Bu könne şundıy uk çara Tübän Tabın cirlegendä dä ütte.
Xxx
Möslimnän 4 keşelek delegatsiya – sotsial mäsälälär buença rayon başkarma komitetı citäkçese urınbasarı R.Soltanov citäkçelegendä Mäskäüdä – Sergiev-Posad şähärendä bulıp kayttı. Şarapovo bistäsendä urnaşkan xärbi çasttä Möslimnän – 5, Sarman rayonınnan ber eget xezmät itä. Möslim delegatsiyase egetlär belän oçraşıp, äti-äniläreneñ, rayon xakimiyateneñ küçtänäçlären tapşırıp, soldatlarnıñ xezmät itü, könküreş şartları belän tanışıp kayttılar. R.Soltanov çast komandirı podpolkovnik Anatoliy Konstantinoviç Baturin belän oçraşıp, rayon başlıgı, rayon Sovetı räise R.Xäbipovnıñ räxmät xatın tapşırdı.
Xxx
Rayonda eşläp kilüçe buydaklar klubı 11 nçe martta “Kayda sin, nasıyp yarım?” iseme astında çirattagı utırışın uzdırdı. Oçraşu-tanışu kiçäsenä rayonıbız avıllarınnan häm Çallıdan barlıgı 6 xatın-kız häm 12 ir-eget kilgän ide. Kiçädä katnaşkan parlar, saylau buença räsmi töstä ber-bersenä turı kilmäsälär dä, soñınnan küpläre oçraşırga, xäbärläşergä süz kueşıp taralıştılar. Möslim mädräsäsendä uzgan älege oçraşuga Mäskäüdän “Rossiyskaya gazeta” jurnalistları da kilgän ide.
xxx
10 mart könne Üräzmät urta mäktäbendä Böek Ciñüneñ 65 ellıgı uñaennan bik matur çara ütkän. Anda Möslimnän Böek Vatan sugışı veterannarı – Äxsän Şäripov, Mansur Zinnurov häm aviatsiya polkovnigı Räşit Şäfıykov sugış temasına ütemle çıgış yasagannar. Oçraşuda Üräzmättä yaşäüçe Böek Vatan sugışı veteranı Mirxafizan Musin häm tıl veteranı Gabit Şäygärdanov ta sugış çorı istälekläre belän urtaklaşkan. Şundıy uk oçraşular başka mäktäplärdä dä dävam itä.
xxx
Bulaçak pensionerlar bügennän ük üzläreneñ pensiyaläre turında kaygırta ala. Xezmät pensiyaseneñ tuplanma öleşenä irekle iminiyat vznosları kertep bula. Elına minimal summa 2 meñ sumnan alıp, maksimal kertem 12 meñ sumnı täşkil itä. El azagına kertkän summanı däülät ikegä tapkırlıy. Yagni elga 2 meñ sum kertkän bulaçak pensionerga, bu summa 4 meñ bulıp äylänep kayta. Uzgan el cirlegebezdän 344 keşe älege mömkinlektän faydalanırga teläp gariza yazgan.