1 nomerlı İske Çüpräle urta mäktäbeneñ  sport    mäydançıgına kuelgan törle töslärdäge flagçıklar iyul koyaşınıñ kaynar nurlarında koenıp, yarışka cıelgan sportçılarnı sälamli. Binihaya tantanalı atmosferanı sportçılarnı karşı algan “Privet uçastnikam Spartakiadı!” digän  sälamläü yulları tulılandıra. Älege bäyge OAO “Tatseljilkomxoz” tarafınnan inde sigezençe tapkır uzdırıla. Kürkäm traditsiyagä äverelgän  älege çaranıñ  Çüpräledä ütkän İdelaryagı etabında Kaybıç, Kama Tamagı, Norlat, Raifa,Çüpräle komandaları katnaştı.

Bäygeneñ tantanalı öleşe Çüpräle munitsipal rayon başlıgı Timur Nagumanov sälamlänüennän başlanıp kitte. Kommunal xucalık çeltäre xezmätkärlärenä   fidakar eşläre  öçen räxmäten beldergän rayon başlıgı, süzen “sälamät tändä-sälämät rux” digän süzlär belän dävam itep, katnaşuçılarnıñ küñellärenä därt östäde. İñ möhime ciñü tügel, ä katnaşu,    duslık şartlarında aralaşu, çönki älege çarada katnaşu üzenä kürä ber ciñü dip assızıkladı. OAO “Tatseljilkomxoz”nıñ  general  direktorı  İrşat Nuräxmätov, üz çiratında, Çüpräle rayonı kommunal xucalık citäkçelegenä älege kürkäm bäygene  äzerläüläre öçen räxmäten belderde. Kütärenke ruxta başlangan bäyge komanda kapitannarınıñ Tatarstan flagın kütärüe belän dävam itte. Bäyräm ruxı  kunaklarnı tatar xalkınıñ milli rizıgı  çäk-çäk belän sıylaudan, ut çıgarıp biyulärdän tagı da arta töşte. Ber-berse belän   elektäge yarışlarda oçraşıp, duslaşıp betkän keşelärneñ kabat küreşü şatlıgı da  östälde bäyräm tantanasına.  Ber tarmakta eşlägän keşelärneñ söyläşer süzläre dä, urtaklaşır fikerläre dä küp bit.

Yarışlar sport  “patşabikäse” - ciñel atletika belän başlanıp kitte. 100 metr aranı iñ kıska vakıt eçendä yögerep ütü  sportçılardan çın mägnäsendä citezlek soradı.

Xatın-kızlar arasında älege distantsiyadä iñ citez bulıp Alisa Efimova  tabıldı, ä İlmira Gubaeva  häm Rezidä  Şayxullina  kalgan ike urınnı  büleştelär. İr-egetlärdän Danis Allayarovka tiñnär bulmadı. İkençe urınnı isä F.Şayxattarov  yaulasa,  öçençe urınga Rädif Xäyrullin  laek buldı.

Uen därtenä birelgän  komandalarnı ikençe sınau itep katnaş estafeta  kötä ide. Näk menä şuşı bäyge komandalarnıñ berdämlegen häm oeşkanlılıgın, tulı ber ciñü teläge belän yanganlıgın kürsätü mömkinlege birde. Rayonıbız komandası ber-berse öçen can atıp toruları belän aerıldı, şuña berençelekkä dä  ireşte. Raifa (2 urın) häm Kaybıç (3 urın ) komandaları da çüprälelärdän küpkä  kalışmadı.

Kul köräşterüdä güzäl zatlarnıñ katnaşuları, Spartakiadaga  küñel kütärenkelege östäde. Rayonıbızda älege sport töre buença berençelekne gel ala kilgän Z.A.Kuçatkova bu yulı da köndäşläre arasında  iñ-iñe buldı. İlmira Gubaeva (2 urın) häm Adeliya Xösnetdinova (3 urın) bezneñ yaktaşıbızga karşılık kürsätep, bu sport töreneñ xatın-kızlar öçen yat bulmavın kürsätte. İr-egetlärgä kilgändä Marat Abbazov köçle köräştä berençelekne yauladı.     Çın irlär sportı sanalgan ger kütärüdä isä, iñ köçlelär köç sınaştı, şunısı igtibarga laek, törle rayonnardan kilgän kommunal  xucalık  citäkçeläre dä älege bäygedän çittä kalmadı, üzläreneñ xezmätkärläre belän ber rättä üzlären sınap kararga buldılar. İñ köçle bulıp Kaybıçtan kilgän kunagıbız Röstäm Garipov tabıldı, annan soñ 2 urınnı Fänis Miñnebaev, ä 3 urınnı  İslam Väliev  yauladı.

Korıç çınıkkan kebek, bezneñ sportçılarıbız da iyulneñ ütä esse hava torışına bireşmiçä, bäygeneñ kiläse etabına yul tottı. Ozınlıkka sikerü kemgäder aeruça ciñel birelgän bulsa, kayber katnaşuçılar öçen ul çın sınau arenasına äylände. Uñışlar häm uñışsızlıklarga  duçar bulıp ta bireşmägän, sınaşırga, bäygene dävam  itärgä köç tapkan keşelärgä karata barı ixtiram häm soklanu xise genä tudı. Çüpräledän Mariya Efimova älege kirtäne barısınnan da yaxşı ütte. Dinä Zinätullina (2 urın) häm İlmira Gubaeva (3 urın) şulay uk maksatka ireşü  yulında töşep kalgannanardan tügel ikänleklären kürsättelär.

İr-egetlärdän Damir Zakirov -1 urın, İlnaz Xafizov -2 urın häm Danis Allayarov 3 urınnı büleştelär.

Bäygeneñ kızgan çagı arkan tartışırga turı kilde. Spartakiadanıñ iñ yugarı   noktası buldı bu, çönki xislär çualgan, köç şaktıy sarıf itelgän ide. Komandalarnıñ “soñgı sulışta” köräşülären kürü, citäkçelärneñ üzläreneñ xezmätkärläre öçen çın canatar bularak yardäm kürsätüläre, köç birep toruları da soklandırdı. Älege “tartışuda”  mäydan xucaları –Çüpräle rayonı komandası berençe buldı.

Prizlı urınnar yaulagan sportçılarga kıymätle büläklär häm Maktau Gramotaların OAO “Tatseljilkomxoz”nıñ general direktorı İrşat Nuriäxmätov tapşırdı. Barlık sport törläre buença oçraklarnı sanagaç, 3 urınga Kaybıç komandası, 2 urınga Raifa komandası, ä menä 1 urınga Çüpräle rayonı komandası laek bulganı bilgele buldı.

Ciñüçe komandanı avgust axırlarında Yugarı Oslanda ütäçäk “Spartakiada– 2010” bäygeseneñ respublika etabına kötälär. Çüprälelelär älege bäygedä İdelaryagı zonası danın yaklayaçak.