"Duslık" ("Drujba", "Tuslax") rayon gazetası öç - tatar, rus, çuvaş telendä, atnaga öç tapkır çıga, tirajı 10300 danä. 2005 elnıñ fevralennän gazetanı S.N.Xäyrullina citäkli.

Gazeta TRnıñ matbugat, teleradiotapşırular häm massaküläm mäglümat çaraları ministrlıgı tarafınnan terkälgän.  Terkälü turındagı tanıklıknıñ nomerı 34.

Gazeta "İdel - Press" poligrafiya - näşriyat kompleksı" AACndä basıla (420066, Kazan şähäre, Dekabristlar, ur. 2), küläme 1 basma tabak.

Rayon gazetası 1931 elda çıgarıla başlıy. Ul öç tapkır isemen alıştıra, başta "Oktyabr kolxozçısı", soñrak "Kommunizm tözüçese", häm annan "Duslık" dip yörtelä başlıy. "Duslık" gazetası respublikanıñ rayon gazetaları arasında berençelärdän bulıp kompyuterda cıyu häm verstkalauga küçte. Gazetanıñ tışkı yöze, poligrafik bizäleşe tamırdan üzgärde. häm xäzerge vakıtta gazeta dizayn ölksendä ezlänülär alıp bara, gazeta stileneñ yaña baglanışları küzätep barıla.

"Tügäräk öställär" ukuçılar, ştattan tış xäbärçelär belän aralaşunıñ populyar formasına äverelde.

Törle tarmaklar eşçänlegen yaktırtıp barganı öçen algan büläkläre gazetanıñ kiñ dairä mänfägatlärne kolaçlavın dälilli. Mäsälän, bolar - 2003 elda TRnıñ Arxitektura  häm TKX ministrlıgı diplomı, RF Pensiya fondınıñ "Pensiya tematikasına bagışlangan iñ yaxşı yazma öçen" III däräcä diplomı, 2003 elda "Tatenergo" häm TR Jurnalistar berlegeneñ "Mnogolikaya energetika" konkursınıñdagı diplom, "Bällür kaläm - 99" konkursınıñ "İñ yaxşı rayon gazetası" nominatsiyasendä laureat iseme,  2004 elda "Keşe häm tabigat" konkursınıñ  "Vakıtlı basmalarda iñ yaxşı yazma" nominatsiyasendä II däräcä diplom h.b.lar.

Gazeta bitlärendä rayon tormışı, anıñ uñışları, şatlıkları - barısı da yaktırtıla, problemalı mäsälälär dä kütärelä. Gazetanıñ mäglümati dairäse üz eçenä kön kadagına sukkan analitik, aktual, obektiv materiallarnı ala, rayon häm şähär yañalıkların, vakıygalarnı  ukuçıga operativ töstä citkerä. Berençe bittä - "Kiçä. Bügen. İrtägä" säxifäse mäglümatları häm "Sişämbedän sişämbegä" fotoxäbärlär tuplanması, "Altınçı bagan" yañalıklar cıelması. "Kommunal reforma gamäldä", "Cirle üzidarä", "Deputat xozurında", "Sotsial yaklau", "APK xäbärläre", "Pensiya fondınnan", "Keşe häm zakon", "Mädäniyat", "Mägarif", "Eşmäkärlärgä",  "Kızıl. Sarı. Yaşel", "Eşlekle dairä" h.b. rubrikalar daimi çıgıp tora, Ekologiya, sälamät yaşäü räveşen propagandalau temaları kisken publitsistik tösmerdä birelä ("Şähär ekologiyase", "Ekologiya", "Sport küzätüe", "Narkotiklarga - yuk dibez!" rubrikaları). Nurlattagı uku yortları, hönäri litsey, yugarı uku yortları filialları turındagı mäglümatlar yaş ukuçılarga sotsial orientir öçen kulay.  "Sorau - cavap", "Dialog: ukuçı - gazeta" rubrikalarında ukuçılar üzlären kızıksındırgan soraularga cavaplar alalar. 2004 elda Ciñüneñ 60 ellıgı aldınnan  gazetada "Böek Ciñüneñ 60 ellıgına" rubrikası açıldı. 2005 elnıñ martınnan maena kadär ukuçılar arasında sugış turındagı iñ yaxşı materialga konkurs ütkärelde. Konkurs materialları gazetanıñ maxsus bitlärendä basıla.

Gaeztanıñ här teldä çıguçısında da (tatar, rus, çuvaş) üz äsärlären "Literaturnaya subbota", "Nurlı yak" säxifälärendä birep baruçı avtorlar bar.

2006 elda Nurlatnıñ "Duslık" gazetası üzeneñ 75 yaşlek yubileen bilgeläp ütte. Gazeta şul çor eçendä bay täcribä tuplap ölgerde, anıñ üzenä genä xas traditsiyaläre bar. Gazeta kollektivı zur icadi potentsiallı täcribäle belgeçlärne dä, yaşlärne dä berläştergän. Alar härçak kızıklı  temalar, yañarışlar ezläüdä.